ਛੇ ਸਾਲਾ ਬੱਚੀ ਨਾਲ ਜਿਸਮਾਨੀ ਛੇੜਛਾੜ ਕਰਨ ਵਾਲਾ ਕਾਬੂ
ਪੁਲਿਸ ਨੇ ਮੌਲੀ ਕੰਪਲੈਕਸ ਮਨੀਮਾਜਰਾ ਦੇ ਨਿਵਾਸੀ ਨਥਨ ਨੂੰ ਆਪਣੇ ਗੁਆਂਢੀ ਦੀ ਛੇ ਸਾਲਾ ਬੱਚੀ ਨਾਲ ਜਿਸਮਾਨੀ ਛੇੜਛਾੜ ਕਰਨ ਦੇ ਦੋਸ਼ ਹੇਠ ਗਿ੍ਫ਼ਤਾਰ ਕੀਤਾ ਹੈ | ਪੁਲਿਸ ਅਨੁਸਾਰ ਨਥਨ ਦੇ ਗੁਆਂਢੀ ਨੇ ਸ਼ਿਕਾਇਤ ਦਰਜ ਕਰਵਾਈ ਸੀ ਕਿ ਨਥਨ ਘਰ ਅੱਗੇ ਖੇਡ ਰਹੀ ਉਸ ਦੀ ਬੱਚੀ ਨੂੰ ਬਹਿਲਾ ਫੁਸਲਾ ਕੇ ਆਪਣੇ ਨਾਲ ਲੈ ਗਿਆ ਅਤੇ ਉਸ ਨਾਲ ਜਿਸਮਾਨੀ ਛੇੜਛਾੜ ਕੀਤੀ, ਲੜਕੀ ਵੱਲੋਂ ਉਸ ਦੇ ਚੁੰਗਲ 'ਚੋਂ ਆਜ਼ਾਦ ਹੋ ਕੇ ਆਪਣੇ ਮਾਪਿਆਂ ਨੂੰ ਇਹ ਗੱਲ ਦੱਸੀ ਤਾਂ ਦੋਸ਼ੀ ਨਥਨ ਆਪਣੇ ਕਾਰੇ ਤੋਂ ਮੁੱਕਰ ਗਿਆ, ਜਿਸ ਪਿੱਛੋਂ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ | ਇਸ ਤੋਂ ਇਲਾਵਾ ਇਕ ਹੋਰ ਮਾਮਲੇ ਵਿਚ ਅਮਰਕਾਂਤ ਅਤੇ ਉਸ ਦੇ ਨਜ਼ਦੀਕੀ ਰਿਸ਼ਤੇਦਾਰ ਬੀਰ ਸਿੰਘ ਉਰਫ਼ ਬੇਰੂ ਵਿਰੁੱਧ ਪੁਲਿਸ ਨੇ ਆਪਣੇ ਇਲਾਕੇ 'ਚੋਂ ਇਕ 18 ਸਾਲਾ ਲੜਕੀ ਨੂੰ ਉਧਾਲਣ ਦਾ ਮਾਮਲਾ ਦਰਜ ਕਰਦਿਆਂ ਇੱਕ ਦੋਸ਼ੀ ਅਮਰਕਾਂਤ ਨੂੰ ਗਿ੍ਫ਼ਤਾਰ ਕਰ ਲਿਆ | ਪੁਲਿਸ ਅਨੁਸਾਰ ਲੜਕੀ ਦੇ ਪਿਤਾ ਨੇ ਸ਼ਿਕਾਇਤ ਦਰਜ ਕਰਵਾਈ ਸੀ ਕਿ ਉਕਤ ਦੋਵਾਂ ਦੋਸ਼ੀਆਂ ਨੇ ਉਸ ਦੀ ਲੜਕੀ ਨੂੰ ਵਰਗਲਾਕੇ ਅਗਵਾ ਕੀਤਾ ਹੈ |
ਕਾਰ ਦਾ ਸ਼ੀਸ਼ਾ ਤੋੜ ਕੇ ਚੋਰੀ
ਸੈਕਟਰ 25 ਦੇ ਅਭਿਮਨਿਊ ਕੋਚਿੰਗ ਸੈਂਟਰ ਅੱਗੇ ਖੜ੍ਹੀ ਦੀਪਜੋਤ ਕੌਰ ਵਾਸੀ ਮੁਹਾਲੀ ਦੀ ਕਾਰ ਦਾ ਸੀਸ਼ਾ ਤੋੜ ਕੇ ਅੰਦਰੋਂ ਸਟੀਰੀਓ ਅਤੇ ਹੋਰ ਸਾਮਾਨ ਚੋਰੀ ਕਰ ਲਿਆ | ਪੁਲਿਸ ਨੂੰ ਸੂਚਨਾ ਦੇਣ 'ਤੇ ਥਾਣਾ ਸੈਕਟਰ 11 ਦੀ ਪੁਲਿਸ ਨੇ ਤੁਰੰਤ ਕਾਰਵਾਈ ਕਰਦਿਆਂ ਇਕ ਦੋਸ਼ੀ ਰੌਕੀ ਵਾਸੀ ਫੇਜ਼ 11 ਮੁਹਾਲੀ ਨੂੰ ਗਿ੍ਫ਼ਤਾਰ ਕਰ ਲਿਆ |
ਝਪਟਮਾਰ ਕਾਬੂ
ਅਜਿਹੇ ਹੀ ਇਕ ਹੋਰ ਮਾਮਲੇ 'ਚ ਸੈਕਟਰ 22 ਨਿਵਾਸੀ ਅਰਪਣਾ ਰਾਣਾ ਦੇ ਗਲੇ 'ਚੋਂ ਸੈਕਟਰ 37-38 ਨੇੜੇ ਸੋਨੇ ਦੀ ਚੈਨ ਝਪਟਣ ਦੀ ਕੋਸ਼ਿਸ਼ ਕਰਨ ਵਾਲੇ ਝਪਟਮਾਰ ਗੁਰਪ੍ਰੀਤ ਵਾਸੀ ਧਨਾਸ ਨੂੰ ਲੋਕਾਂ ਨੇ ਕਾਬੂ ਕਰਕੇ ਪੁਲਿਸ ਹਵਾਲੇ ਕਰ ਦਿੱਤਾ, ਜਿਸ ਪਿੱਛੋਂ ਪੁਲਿਸ ਨੇ ਪੁੱਛਗਿੱਛ ਦੇ ਆਧਾਰ 'ਤੇ ਉਸ ਦੇ ਉਸਤਾਦ ਕਾਲੂ ਵਾਸੀ ਧਨਾਸ ਨੂੰ ਵੀ ਗਿ੍ਫ਼ਤਾਰ ਕਰ ਲਿਆ |
ਮੋਟਰਸਾਈਕਲ ਸਵਾਰ ਚੈਨੀ ਝਪਟ ਕੇ ਫਰਾਰ
ਸੈਕਟਰ 48 ਨਿਵਾਸੀ ਗੁਦੰਬਰੀ ਜੋਸ਼ੀ ਨੇ ਮਾਮਲਾ ਦਰਜ ਕਰਵਾਇਆ ਹੈ ਕਿ ਮੋਟਰ ਸਾਈਕਲ 'ਤੇ ਸਵਾਰ ਦੋ ਨੌਜਵਾਨ ਉਸ ਦੇ ਗਲੇ 'ਚੋਂ ਸੋਨੇ ਦੀ ਚੈਨ ਝਪਟ ਕੇ ਫ਼ਰਾਰ ਹੋ ਗਏ | ਇਸੇ ਤਰ੍ਹਾਂ ਸੈਕਟਰ 47 ਨਿਵਾਸੀ ਸੁਦਰਸ਼ਨਾ ਸ਼ਰਮਾ ਦੇ ਗਲੇ 'ਚੋਂ ਵੀ ਦੋ ਮੋਟਰ ਸਾਈਕਲ ਸਵਾਰਾਂ ਨੇ ਸੋਨੇ ਦੀ ਸਮਝ ਕੇ ਚੈਨ ਝਪਟ ਲਈ, ਜੋਕਿ ਅਸਲ ਵਿਚ 10 ਰੁਪਏ ਵਾਲੀ ਨਕਲੀ ਚੈਨ ਸੀ |
ਬੋਲੈਰੋ ਚੋਰੀ
ਚੋਰੀ ਦੀਆਂ ਹੋਰ ਵਾਰਦਾਤਾਂ ਵਿਚ ਹੋਮਗਾਰਡ ਕਮਾਡੈਂਟ ਹਰਿਆਣਾ ਦੇ ਡਰਾਈਵਰ ਸੁਭਾਸ਼ ਚੰਦ ਨੇ ਮਾਮਲਾ ਦਰਜ ਕਰਵਾਇਆ ਹੈ ਕਿ ਉਨ੍ਹਾਂ ਦੀ ਸਰਕਾਰੀ ਬੋਲੈਰੋ ਜੀਪ ਕਿਸੇ ਨੇ ਸੈਕਟਰ 43 'ਚੋਂ ਉਸ ਦੇ ਘਰ ਅੱਗੋਂ ਹੀ ਚੋਰੀ ਕਰ ਲਈ, ਜਦਕਿ ਸੈਕਟਰ 43 'ਚ ਹੀ ਪੈਂਦੇ ਅਦਾਲਤੀ ਕੰਪਲੈਕਸ 'ਚੋਂ ਭੁਪੇਸ਼ਕਾਂਤ ਦਾ ਐਕਟਿਵਾ ਸਕੂਟਰ ਚੋਰੀ ਹੋਣ ਦੀ ਸੂਚਨਾ ਹੈ |
