ਸ਼੍ਰੋਮਣੀ ਕਮੇਟੀ ਚੋਣਾਂ ਬਨਾਮ ਇੱਛਾਧਾਰੀ ਸਿੱਖ
ਸਿਰਫ਼ ਸ਼੍ਰੋਮਣੀ ਕਮੇਟੀ ਚੋਣਾਂ ਲੜਨ ਲਈ ਅੰਮ੍ਰਿਤਧਾਰੀ ਹੋਏ ਲੋਕ
ਸਿੱਖੀ ਦਾ ਕੀ ਭਲਾ ਕਰਨਗੇ ?
ਹੁਣ ਜਦੋਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ ਵਿੱਚ ਮਹਿਜ ਹੀ ਕੁਝ ਦਿਨ ਬਾਕੀ ਹਨ, ਤਾਂ ਸ਼੍ਰੋਮਣੀ ਕਮੇਟੀ ਚੋਣਾਂ 'ਚ ਹਿੱਸਾ ਲੈਣ ਵਾਲੇ ਵੋਟਰਾਂ ਬਾਰੇ ਭੰਬਲਭੂਸਾ ਅਜੇ ਵੀ ਜਾਰੀ ਹੈ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ ਵਿੱਚ ਸਹਿਜਧਾਰੀ ਸਿੱਖਾਂ ਨੂੰ ਵੋਟਰ ਬਣਾਉਣ ਸਬੰਧੀ ਮਾਮਲਾ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਚੰਡੀਗੜ• ਵਿੱਚ ਵਿਚਾਰਅਧੀਨ ਹੈ। ਸਹਿਜਧਾਰੀ ਫੈਡਰੇਸ਼ਨ ਵੱਲੋਂ ਇਸ ਸਬੰਧੀ ਪਾਈ ਗਈ ਪਟੀਸ਼ਨ ਬਾਰੇ ਮਾਨਯੋਗ ਅਦਾਲਤ ਵੱਲੋਂ ਸੁਣਵਾਈ ਵੀ ਕੀਤੀ ਜਾ ਰਹੀ ਹੈ ਅਤੇ ਨਾਲੋਂ ਨਾਲ ਸਰਕਾਰ ਵੱਲੋਂ ਸ਼੍ਰੋਮਣੀ ਕਮੇਟੀ ਚੋਣਾਂ ਲਈ ਨੋਟੀਫਿਕੇਸ਼ਨ ਜਾਰੀ ਕਰਕੇ 18 ਸਤੰਬਰ ਨੂੰ ਇਹ ਚੋਣਾਂ ਕਰਵਾਈਆਂ ਜਾ ਰਹੀਆਂ ਹਨ। ਅਦਾਲਤ ਵੱਲੋਂ ਲਏ ਗਏ ਫੈਸਲੇ ਨਾਲ ਇਹ ਚੋਣਾਂ ਸਮੇਂ 'ਤੇ ਹੋ ਸਕਣਗੀਆਂ ਜਾਂ ਨਹੀਂ ਇਹ ਇੱਕ ਵਖਰਾ ਵਿਸ਼ਾ ਹੈ, ਪਰ ਜਿਸ ਹਾਲਾਤ ਵਿੱਚ ਮੌਜੂਦਾ ਐਲਾਨੇ ਪ੍ਰੋਗਰਾਮ ਤਹਿਤ ਇਹ ਚੋਣਾਂ ਹੋ ਰਹੀਆਂ ਹਨ, ਉਸ ਦੇ ਮੱਦੇਨਜਰ ਵੀ ਸ਼੍ਰੋਮਣੀ ਕਮੇਟੀ ਚੋਣਾਂ 'ਚ ਹਿੱਸਾ ਲੈ ਰਹੇ ਉਮੀਦਵਾਰਾਂ ਅਤੇ ਵੋਟਰਾਂ ਬਾਰੇ ਕਈ ਤਰਾਂ• ਦੇ ਸਵਾਲ ਉਠ ਰਹੇ ਹਨ। ਪਿਛਲੇ ਸਮੇਂ ਦੌਰਾਨ ਅਦਾਲਤ ਵੱਲੋਂ ' ਸਹਿਜਧਾਰੀ ਅਤੇ ਪਤਿੱਤ ਸਿੱਖ ਦੀ ਪ੍ਰੀਭਾਸ਼ਾ' ਮੰਗੇ 'ਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਅਦਾਲਤ ਵਿੱਚ ਦਿੱਤੇ ਗਏ ਨਵੇਂ ਹਲਫ਼ਨਾਮੇ 'ਚ ਕਿਹਾ ਗਿਆ ਸੀ ਕਿ ਸਿੱਖ ਗੁਰਦੁਆਰਾ ਐਕਟ 1925 ਦੀ ਧਾਰਾ 2 ਅਨੁਸਾਰ 'ਜੋ ਵਿਅਕਤੀ ਕੇਸਧਾਰੀ ਹੈ, ਪਰ ਉਸਨੇ ਅੰਮ੍ਰਿਤਪਾਨ ਨਹੀਂ ਕੀਤਾ ਹੋਇਆ, ਉਹ ਸਹਿਜਧਾਰੀ ਹੈ ਅਤੇ ਜੋ ਜਿਸ ਵਿਅਕਤੀ ਨੇ ਅੰਮ੍ਰਿਤ ਛਕ ਕੇ ਭੰਗ ਕੀਤਾ ਹੈ, ਉਹ ਪਤਿੱਤ ਸਿੱਖ ਹੈ। ਇਸ ਪ੍ਰੀਭਾਸ਼ਾ ਨਾਲ ਭਾਵੇਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਅਦਾਲਤ ਤੋਂ ਇਸ ਨਵੇਂ ਹਲਫਨਾਮੇ ਨਾਲ ਪੱਲਾ ਤਾਂ ਛੁੜਵਾ ਲਿਆ ਸੀ, ਪਰ Àਸ ਸਮੇਂ ਸਿੱਖ ਕੌਮ ਦੀ ਪਾਰਲੀਮੈਂਟ ਕਹੀ ਜਾਣ ਵਾਲੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਇਹ ਬਿਲਕੁਲ ਹੀ ਨਹੀਂ ਸੋਚਿਆ ਕਿ 'ਸਹਿਜਧਾਰੀ ਸਿੱਖ' ਦੀ ਇਸ ਪ੍ਰੀਭਾਸ਼ਾ ਨਾਲ ਸਿੱਖ ਕੌਮ ਨੂੰ ਕਿਹੜੀਆਂ ਨਵੀਆਂ ਦਿੱਕਤਾਂ ਆ ਸਕਦੀਆਂ ਹਨ? ਇੱਕ ਪਾਸੇ ਤਾਂ ਇਸ ਵਾਰ ਦੀਆਂ ਚੋਣਾਂ ਲਈ ਗੁਰਦੁਆਰਾ ਚੋਣ ਕਮਿਸ਼ਨ ਇਥੋਂ ਤੱਕ ਕਹਿ ਦਿੱਤਾ ਹੈ ਕਿ ਪਤਿੱਤ ਸਿੱਖ ਵੋਟਰਾਂ ਦੀ ਵੋਟ ਪਾਉਣ ਸਮੇਂ ਗ੍ਰਿਫ਼ਤਾਰੀ ਹੋ ਸਕਦੀ ਹੈ। ਦੂਸਰੇ ਪਾਸੇ ਸ਼੍ਰੀ ਅਕਾਲ ਤਖਤ ਸਾਹਿਬ ਤੋਂ ਹੁਕਮਨਾਮਾ ਜਾਰੀ ਕਰ ਦਿੱਤਾ ਗਿਆ ਹੈ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਲੜ• ਰਹੇ ਸਾਰੇ ਉਮੀਦਵਾਰ ਪਰਵਾਰਾਂ ਸਮੇਤ ਅੰਮ੍ਰਿਤਧਾਰੀ ਹੋ ਜਾਣ। ਗੁਰਦੁਆਰਾ ਚੋਣ ਕਮਿਸ਼ਨ ਦਾ ਇਹ ਫੈਸਲਾ ਸ਼੍ਰੋਮਣੀ ਕਮੇਟੀ ਚੋਣਾਂ ਦੌਰਾਨ ਜਿਥੇ ਵੱਡੇ ਕਲੇਸ਼ ਦਾ ਕਾਰਨ ਬਣੇਗਾ, ਉਥੇ ਸ਼੍ਰੀ ਅਕਾਲ ਤਖਤ ਸਾਹਿਬ ਤੋਂ ਜਾਰੀ ਕੀਤੇ ਗਏ ਹੁਕਮਨਾਮੇ ਨਾਲ ਦੁਨੀਆਂ ਸਾਹਮਣੇ ਸਿੱਖ ਕੌਮ ਦੀ ਜੱਗ ਹਸਾਈ ਵੱਖਰੀ ਹੋਵੇਗੀ, ਕਿਉਂਕਿ ਸਿਰਫ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਲੜਨ ਦੀ ਇੱਛਾ ਨਾਲ ਅੰਮ੍ਰਿਤਧਾਰੀ ਹੋਣ ਵਾਲੇ ਉਮੀਦਵਾਰ ਸਿੱਖ ਕੌਮ ਦਾ ਕਿਹੋ ਜਿਹਾ ਭੱਵਿਖ ਸਿਰਜਣਗੇ, ਇਸ ਬਾਰੇ ਕੁਝ ਕਹਿਣ ਸੁਣਨ ਦੀ ਗੁਜ਼ਾਇਸ਼ ਹੀ ਨਹੀਂ ਬਚਦੀ। ਦੂਸਰੇ ਪਾਸੇ ਸਿਰਫ਼ ਕੇਸਧਾਰੀਆਂ ਨੂੰ ਵੋਟਰ ਮੰਨਣ ਨਾਲ ਕੇਸਾਧਾਰੀ ਹਿੰਦੂਆਂ ਦੇ ਨਾਲ ਨਾਲ ਡੇਰੇਵਾਦੀਆਂ ਨਾਲ ਜੁੜੇ ਕੇਸਾਧਾਰੀ ਲੋਕਾਂ ਨੂੰ ਵੀ ਗੁਰਦੁਆਰਿਆਂ ਦੇ ਪ੍ਰਬੰਧਾਂ ਵਿਚ ਦਖਲ ਅੰਦਾਜ਼ੀ ਕਰਨ ਦੀ ਇਜਾਜਤ ਮਿਲ ਜਾਵੇਗੀ। ਮਸਲਨ ਰਾਧਾ ਸੁਆਮੀਆਂ ਦੇ ਡੇਰੇ ਅਤੇ ਡੇਰਾ ਸਿਰਸਾ ਦੇ ਮੁੱਖੀਆਂ ਸਮੇਤ ਇਹਨਾਂ ਡੇਰਿਆਂ ਦੇ ਸ਼ਰਧਾਲੂਆਂ ਵਿੱਚ ਤੀਹ ਫੀਸਦੀ ਤਦਾਦ ਕੇਸਾਧਾਰੀ ਲੋਕਾਂ ਦੀ ਹੈ। ਇਸੇ ਤਰਾਂ ਉਹ ਲੋਕ ਵੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ ਵਿੱਚ ਵੱਡੀ ਗਿਣਤੀ 'ਚ ਉਹ ਵੋਟਰ ਆਪਣੀ ਵੋਟ ਦਾ ਇਸਤੇਮਾਲ ਕਰਨਗੇ, ਜਿਹਨਾਂ ਲੋਕਾਂ ਨੂੰ ਹੁਣ ਤੱਕ ਸ੍ਰੀ ਅਕਾਲ ਤਖਤ ਦੇ ਹੁਕਮਨਾਮੇ ਦੇ ਨਾਮ ਉਪਰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦਾ ਸਰੂਪ ਦੇਣ ਤੋਂ ਇਨਕਾਰ ਕੀਤਾ ਜਾਂਦਾ ਰਿਹਾ ਹੈ। ਇਸੇ ਤਰ•ਾਂ ਯੋਗ-ਗੁਰੂ ਕਹੇ ਜਾਣ ਵਾਲੇ ਬਾਬਾ ਰਾਮਦੇਵ ਸਮੇਤ ਕਿੰਨੇ ਹੀ ਸਨਾਤਨ ਧਰਮ ਨੂੰ ਮੰਨਣ ਵਾਲੇ ਸਾਧੂ ਸੰਤ ਕੇਸਾਧਾਰੀ ਹਨ। ਇਸ ਤੋਂ ਇਲਾਵਾ ਔਰਤਾਂ ਤਾਂ ਕੁਝ ਕੁ ਛੱਡ ਕੇ ਸਾਰੀਆਂ ਹੀ ਕੇਸਾਧਾਰੀ ਹਨ, ਜੋ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ ਵਿੱਚ ਵੋਟਰ ਹੋਣ ਦੀਆਂ ਸ਼ਰਤਾਂ ਪੂਰੀਆਂ ਕਰਦੀਆਂ ਹਨ । ਆਰ.ਐਸ.ਐਸ. ਦੁਆਰਾ ਸਿਰਜੀ ਗਈ ਜਥੇਬੰਦੀ 'ਰਾਸ਼ਟਰੀ ਸਿੱਖ ਸੰਗਤ' ਤਾਂ ਸਾਰੀ ਹੀ ਕੇਸਾਧਾਰੀ ਹੈ। ਇਸ ਤਰਾਂ• ਇਕ ਅਜਿਹਾ ਤਬਕਾ ਗੁਰਦੁਆਰਾ ਪ੍ਰਬੰਧਾਂ ਵਿਚ ਭਾਰੂ ਹੋਵੇਗਾ, ਜੋ ਅਸਲੋਂ ਸਿੱਖ ਧਰਮ ਦੀ ਬੁਨਿਆਦ ਨੂੰ ਖਤਮ ਕਰਕੇ, ਬਿਪਰਵਾਦ ਅਤੇ ਡੇਰਾਵਾਦ ਨੂੰ ਲਾਗੂ ਕਰਨਾ ਚਾਹੁੰਦਾ ਹੈ ਅਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਸਰਬਉੱਚ ਮੰਨਣ ਦੀ ਥਾਂ ਦੇਹਧਾਰੀ ਗੁਰੂਆਂ ਨੂੰ ਮੰਨ ਰਿਹਾ ਹੈ ।
ਭਾਵੇਂ ਹੇਠ ਲਿਖੀ ਘਟਨਾ ਦਾ ਜ਼ਿਕਰ ਮੈ ਪਹਿਲਾਂ ਵੀ ਇੱਕ ਲੇਖ ਵਿੱਚ ਕਰ ਚੁਕਿਆ ਹਾਂ, ਪਰ ਹੁਣ 18 ਸਤੰਬਰ ਨੂੰ ਹੋ ਰਹੀਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ 'ਚ ਤੁਰੰਤ ਅੰਮ੍ਰਿਤਧਾਰੀ ਹੋ ਕੇ ਚੋਣਾਂ ਲੜ•ਨ ਉਤਰੇ ਉਮੀਦਵਾਰਾਂ ਅਤੇ 'ਸਹਿਜਧਾਰੀ ਸਿੱਖਾਂ' ਦਾ ਮਾਮਲਾ ਲਟਕਦਾ ਹੋਣ ਦੇ ਮੱਦੇਨਜਰ, ਉਹ ਘਟਨਾ ਇੱਕ ਵਾਰ ਫੇਰ ਪਾਠਕਾਂ ਨਾਲ ਸਾਂਝੀ ਕਰ ਰਿਹਾ ਹਾਂ, ਜਿਸ ਨੇ ਸਿੱਖ ਕੌਮ ਦੀ ਪਾਰਲੀਮੈਂਟ ਕਹੀ ਜਾਣ ਵਾਲੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ ਨੂੰ ਨਗਰ ਕੌਂਸਲ ਦੀਆਂ ਚੋਣਾਂ ਨਾਲੋਂ ਵੀ ਨੀਵੇਂ ਪੱਧਰ ਦੀ ਚੋਣ ਸਾਬਤ ਕਰ ਦਿੱਤਾ ਸੀ। ਕਰੀਬ 15 ਸਾਲ ਪਹਿਲਾਂ 1996 'ਚ ਹੋਈਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ ਸਮੇਂ ਮੇਰੀਆਂ ਅੱਖਾਂ ਸਾਹਮਣੇ ਹੋਈ ਇਹ ਘਟਨਾ ਇੱਕ ਪੋਲਿੰਗ ਸਟੇਸ਼ਨ 'ਤੇ ਵਾਪਰੀ। ਹੋਇਆ ਇਹ ਕਿ ਇੱਕ ਤੇਜ਼ ਤਰਾਰ ਜਥੇਦਾਰ 'ਜੋ ਅੱਜਕਲ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਵਿਚ ਸਰਗਰਮ ਹੈ, ਉਸ ਸਮੇਂ ਸ਼੍ਰੋਮਣੀ ਅਕਾਲੀ ਦਲ (ਅ) ਦੀ ਟਿਕਟ 'ਤੇ ਚੋਣ ਲੜ ਰਿਹਾ ਸੀ। ਉਸ ਜਥੇਦਾਰ ਨੇ ਆਪਣਾ ਵੋਟ ਬੈਂਕ ਵਧਾਉਣ ਲਈ ਆਪਣੇ ਪੱਕੇ ਸਮਰਥਕ ਇਕ ਮੁਸਲਮਾਨ ਘਰਾਣੇ ਦੀਆਂ ਵੱਡੀ ਗਿਣਤੀ ਵਿਚ ਵੋਟਾਂ ਸਹਿਜਧਾਰੀ ਸਿੱਖਾਂ ਦੇ ਨਾਮ ਹੇਠ ਬਣਾਈਆਂ ਹੋਈਆਂ ਸਨ। ਇਸ ਘਰਾਣੇ ਦਾ ਮੁੱਖੀ ਸਥਾਨਿਕ ਪੱਧਰ 'ਤੇ ਮਾਲੀ ਯੂਨੀਅਨ ਦਾ ਪ੍ਰਧਾਨ ਵੀ ਸੀ, ਜਿਸ ਕਾਰਨ ਪੁਲਸ ਸਮੇਤ ਸਿਵਲ ਪ੍ਰਸ਼ਾਸਨ ਵਿਚ ਉਸਦੀ ਚੰਗੀ ਜਾਣ ਪਛਾਣ ਸੀ। ਚੋਣ ਲੜ• ਰਹੇ ਉਕਤ ਜਥੇਦਾਰ ਦੇ ਬੰਦਿਆਂ ਨੇ Àਸ ਮੁਸਲਮਾਨ ਘਰਾਣੇ ਨੂੰ ਪੂਰੀ ਤਰ•ਾਂ ਸਮਝਾਕੇ ਵੋਟ ਪਾਉਣ ਭੇਜਿਆ ਕਿ ਜੇਕਰ ਕਿਸੇ ਨੇ ਤੁਹਾਨੂੰ ਪੋਲਿੰਗ ਸਟੇਸ਼ਨ 'ਤੇ ਕੁਝ ਪੁੱਛਿਆ ਤਾਂ ਤੁਸੀਂ ਕਹਿ ਦੇਣਾ ਕਿ 'ਅਸੀਂ ਸਹਿਜਧਾਰੀ ਸਿੱਖ ਹਾਂ'। ਸਾਰੀ ਗੱਲ ਸਮਝਣ ਤੋਂ ਬਾਅਦ ਉਕਤ ਮਾਲੀ ਯੂਨੀਅਨ ਦੇ ਪ੍ਰਧਾਨ ਸਾਹਿਬ ਆਪਣੇ ਮੁਸਲਮਾਨ ਘਰਾਣੇ ਸਮੇਤ ਵੋਟ ਪਾਉਣ ਲਈ ਲਾਈਨ ਵਿਚ ਲੱਗ ਗਏ। ਉਥੇ ਤਾਇਨਾਤ ਪੁਲਸ ਦਾ ਇਕ ਛੋਟਾ ਥਾਣੇਦਾਰ ਉਸ ਮਾਲੀ ਯੂਨੀਅਨ ਦੇ ਪ੍ਰਧਾਨ ਨੂੰ ਥਾਣੇ ਦਰਬਾਰੇ ਆਉਂਦਾ ਹੋਣ ਕਰਕੇ ਜਾਣਦਾ ਸੀ। ਜਦੋਂ ਲਾਇਨ 'ਚ ਵੱਧਦਾ-ਵੱਧਦਾ ਉਕਤ ਮਾਲੀ ਯੂਨੀਅਨ ਦਾ ਪ੍ਰਧਾਨ ਸਾਬ• ਉਥੇ ਤਾਇਨਾਤ ਉਸ ਥਾਣੇਦਾਰ ਕੋਲ ਪਹੁੰਚਿਆ ਤਾਂ ਅੱਗੋਂ ਉਸ ਥਾਣੇਦਾਰ ਨੇ ਮਜ਼ਾਕੀਆ ਅੰਦਾਜ਼ ਵਿਚ ਪੁੱਛ ਲਿਆ ਕਿ '' ਓ ਹਮੀਦ! ਤੂੰ ਤਾਂ ਯਾਰ ਮੁਸਲਮਾਨ ਏ ਤੇ ਇਥੇ ਤਾਂ ਗੁਰਦੁਆਰਿਆਂ ਦੀਆਂ ਵੋਟਾਂ ਪੈ ਰਹੀਆਂ ਨੇ, ਉਏ, ਇਥੇ ਤੇਰਾ ਕੀ ਕੰਮ ਐ'' ਇਸ 'ਤੇ ਉਕਤ ਮਾਲੀ ਯੂਨੀਅਨ ਦੇ ਪ੍ਰਧਾਨ ਸਾਬ• ਸ਼ਾਇਦ ਸਹਿਜਧਾਰੀ ਸ਼ਬਦ ਪਹਿਲੀ ਵਾਰ ਸੁਣਿਆ ਹੋਣ ਕਰਕੇ ਭੁੱਲ ਗਏ ਅਤੇ ਤਪਾਕ ਦੇਣੇ ਕਹਿਣ ਲੱਗੇ 'ਓ ਜਨਾਬ! ਅਸੀਂ ਵੀ ਇੱਛਾਧਾਰੀ ਸਿੱਖ ਹੁੰਦੇ ਹਾਂ'' ਏਨਾ ਕਹਿਣ ਨਾਲ ਉਥੇ ਸਾਰੇ ਪਾਸੇ ਹਾਸੜ ਮੱਚ ਗਈ ਅਤੇ ਉਕਤ ਥਾਣੇਦਾਰ ਉਸ ਅਕਾਲੀ ਉਮੀਦਵਾਰ ਦੇ ਪੋਲਿੰਗ 'ਤੇ ਬੈਠੇ ਸੱਜਣਾਂ ਨੂੰ ਕਹਿ ਰਿਹਾ ਸੀ ਕਿ '' ਬੱਲੇ ਓ ਜਥੇਦਾਰੋ! ਇੱਛਾਧਾਰੀ ਸੱਪਾਂ ਵਾਰੇ ਤਾਂ ਬਹੁਤ ਵਾਰੀ ਸੁਣਿਆ ਹੈ, ਪਰ ਆਹ ਪਤੰਦਰੋ! ਤੁਸੀਂ ਤਾਂ ਇੱਛਾਧਾਰੀ ਸਿੱਖ ਵੀ ਪੈਦਾ ਕਰ ਦਿੱਤੇ '' ਪੋਲਿੰਗ 'ਤੇ ਬੈਠੇ ਉਕਤ ਜਥੇਦਾਰ ਦੇ ਸਮਰਥਕਾਂ ਨੂੰ ਥਾਣੇਦਾਰ ਦੇ ਇਸ ਸਵਾਲ ਦਾ ਜਵਾਬ ਨਹੀਂ ਸੁਝ ਰਿਹਾ ਸੀ।
ਇਥੇ ਇਸ ਘਟਨਾ ਦਾ ਵੇਰਵਾ ਇਸ ਲਈ ਦੇ ਰਹੇ ਹਾਂ ਕਿ ਇਹ ਵਰਤਾਰਾ ਸਿਰਫ਼ ਤੇ ਸਿਰਫ਼ ਸਿੱਖ ਕੌਮ ਅੰਦਰ ਹੀ ਹੈ, ਜਦਕਿ ਦੁਨੀਆਂ ਦੇ ਕਿਸੇ ਵੀ ਹੋਰ ਧਰਮ ਵਿਚ ਇਸ ਤਰਾਂ ਦੇ ਸੈਮੀ ਧਰਮੀਆਂ ਦੀ ਜਮਾਤ ਕਿਧਰੇ ਵੀ ਦੇਖਣ ਨੂੰ ਨਹੀਂ ਮਿਲਦੀ। ਈਸਾਈ ਸਿਰਫ਼ ਈਸਾਈ ਹਨ, ਮੁਸਲਮਾਨ ਸਿਰਫ਼ ਮੁਸਲਮਾਨ ਹਨ ਅਤੇ ਹਿੰਦੂ ਸਿਰਫ਼ ਹਿੰਦੂ ਹਨ, ਕਿਸੇ ਵੀ ਹੋਰ ਧਰਮ ਵਿੱਚ ਇਹ ਦੂਸਰੀ ਜਾਂ ਤੀਸਰੀ ਕਤਾਰ ਭਾਵ ਸਹਿਜਧਾਰੀ ਜਾਂ ਪਤਿੱਤ ਦਾ ਜ਼ਿਕਰ ਨਹੀਂ ਹੈ।ਇਸੇ ਤਰ•ਾਂ ਮੁਸਲਮਾਨਾਂ, ਈਸਾਈਆਂ, ਯਹੂਦੀਆਂ,ਹਿੰਦੂਆਂ ਅਤੇ ਹੋਰ ਧਰਮਾਂ ਦੀਆਂ ਧਾਰਮਿਕ ਸੰਸਥਾਵਾਂ ਵਿਚ ਸਿਰਫ ਉਹੀ ਵਿਅਕਤੀ ਸ਼ਾਮਲ ਕੀਤੇ ਜਾਂਦੇ ਹਨ, ਜੋ ਆਪੋ ਆਪਣੇ ਧਰਮਾਂ ਵਿਚ ਪਰਪੱਕ ਹੰਦੇ ਹਨ, ਕਿਤੇ ਵੀ ਅਜਿਹਾ ਨਹੀਂ ਕਿ ਕਿਸੇ ਦੂਜੇ ਧਰਮ ਦੇ ਵਿਆਕਤੀਆਂ ਜਾਂ ਸਬੰਧਿਤ ਧਰਮ ਨਾਲ ਅੱਧ ਪਚੱਧੀ ਆਸਥਾ ਰੱਖਣ ਵਾਲੇ ਨੂੰ ਵਿਅਕਤੀਆਂ ਨੂੰ ਕਿਸੇ ਵੀ ਧਰਮ ਦੀਆਂ ਧਾਰਮਿਕ ਸੰਸਥਾਵਾਂ ਦੀ ਜਿੰਮੇਵਾਰੀ ਵਿਚ ਦਖਲ ਅੰਦਾਜ਼ੀ ਕਰਨ ਦੀ ਇਜਾਜ਼ਤ ਹੋਵੇ।ਇਥੇ ਇਹ ਵੀ ਵਿਚਾਰਨਯੋਗ ਹੈ ਕਿ ਸਿੱਖ ਇਤਿਹਾਸ ਵਿਚ ਜੇਕਰ ਕਿਤੇ ਸਹਿਜਧਾਰੀ ਸਿੱਖਾਂ ਦਾ ਵਰਨਣ ਆਉਂਦਾ ਹੈ ਤਾਂ ਹੋ ਸਕਦਾ ਹੈ ਕਿ ਗੁਰੂ ਸਾਹਿਬਾਨ ਨੇ ਕਿਸੇ ਨੀਤੀ ਤਹਿਤ ਹੀ ਅਜਿਹੀ ਕੋਈ ਢਿੱਲ ਦਿੱਤੀ ਹੋਵੇਗੀ। ਗੁਰੂ ਸਾਹਿਬਾਨ ਦੇ ਜੀਵਨ ਕਾਲ ਵਿਚ 'ਮੰਜੀਆਂ, ਮਸੰਦਾਂ, ਮਹੰਤਾਂ ਆਦਿ ਕਿੰਨੀਆਂ ਹੀ ਪ੍ਰਥਾਵਾਂ ਚੱਲੀਆਂ ਅਤੇ ਸਮੇਂ ਦੇ ਬੀਤਣ 'ਤੇ ਖਤਮ ਵੀ ਹੁੰਦੀਆਂ ਰਹੀਆਂ। ਜਦੋਂ ਗੁਰੂ ਗੋਬਿੰਦ ਸਿੰਘ ਜੀ ਨੇ ਖਾਲਸੇ ਦੀ ਸਿਰਜਣਾ ਕੀਤੀ ਤਾਂ ਹਰ ਸਿੱਖ ਲਈ ਪੰਜ ਕਕਾਰ ਅਤੇ ਰਹਿਤਾਂ, ਕੁਰਹਿਤਾਂ ਵਾਰੇ ਸ਼ਖਤੀ ਨਾਲ ਹੁਕਮ ਜਾਰੀ ਕਰ ਦਿੱਤੇ ਅਤੇ ਇਹਨਾਂ ਨੂੰ ਤੋੜਨ
ਵਾਲੇ ਨੂੰ ਪਤਿੱਤ ਸਿੱਖ ਦਾ ਨਾਮ ਦਿੱਤਾ ਗਿਆ। ਆਪਣੀ ਸੰਸਾਰਕ ਯਾਤਰਾ ਪੂਰੀ ਕਰਨ ਤੋਂ ਪਹਿਲਾਂ ਖਾਲਸੇ ਨੂੰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਲੜ ਲਗਾ ਕੇ, ਗ੍ਰੰਥ ਅਤੇ ਪੰਥ ਦੀ ਸਾਰੀ ਸੇਵਾ ਸੰਭਾਲ ਖਾਲਸੇ ਨੂੰ ਸੌਂਪ ਦਿੱਤੀ ਤਾਂ ਉਥੇ ਉਹਨਾਂ ਕਿਤੇ ਵੀ ਸਹਿਜਧਾਰੀ ਸਿੱਖਾਂ ਲਈ ਕੋਈ ਵੱਖਰੀ ਜਿੰਮੇਵਾਰੀ ਨਹੀਂ ਰੱਖੀ। ਗੁਰੂ ਗ੍ਰੰਥ ਸਾਹਿਬ ਵਿਚ ਨਿਹਚਾ ਰੱਖਣ ਵਾਲੇ ਦੂਸਰੇ ਧਰਮਾਂ ਦੇ ਲੋਕਾਂ ਲਈ ਅਤੇ ਪੂਰੀ ਤਰਾਂ ਰਹਿਤ ਮਰਿਯਾਦਾ ਵਿਚ ਨਾ ਰਹਿਣ ਵਾਲੇ ਸਿੱਖਾਂ ਲਈ ਗੁਰੂਘਰਾਂ 'ਚ ਗੁਰਬਾਣੀ ਸੁਨਣ, ਕੀਰਤਨ ਸੁਨਣ ਅਤੇ ਗੁਰੂਘਰਾਂ 'ਚ ਸੇਵਾ ਕਰਨ ਲਈ ਕਿਤੇ ਵੀ ਕੋਈ ਬੰਦਸ ਨਹੀਂ ਹੋਣੀ ਚਾਹੀਦੀ, ਪਰ ਗੁਰੂਘਰਾਂ ਦੀ ਸੇਵਾ ਸੰਭਾਲ ਦਾ ਜਿੰਮਾਂ ਦਾ ਗੁਰੂ ਸਾਹਿਬਾਨ ਵੱਲੋਂ ਪ੍ਰਮਾਣਿਤ ਕੀਤੇ ਗਏ ਅੰਮ੍ਰਿਤਧਾਰੀ ਸਿੱਖਾਂ ਦਾ ਹੀ ਹੋਣਾ ਚਾਹੀਦਾ ਹੈ । ਜੇਕਰ ਅਸੀਂ ਮੰਨਦੇ ਹਾਂ ਕਿ ਗੁਰੂ ਗੋਬਿੰਦ ਸਿੰਘ ਜੀ ਦੇ ਬਚਨ ਹਨ ਕਿ 'ਰਹਿਤ ਪਿਆਰੀ ਮੁਝ ਕੋ, ਸਿੱਖ ਪਿਆਰਾ ਨਾਹਿ' ਤਾਂ ਇਥੇ ਕੋਈ ਗੁਜਾਇਸ਼ ਨਹੀਂ ਬਚਦੀ ਕਿ ਗੁਰੂਘਰਾਂ ਦੇ ਪ੍ਰਬੰਧਾਂ ਵਿਚ ਰਹਿਤ ਮਰਿਯਾਦਾ ਤੋਂ ਬਾਹਰਲੇ ਵਿਅਕਤੀਆਂ ਨੂੰ ਦਖਲ ਅੰਦਾਜੀ ਕਰਨ ਦੀ ਇਜਾਜ਼ਤ ਦਿੱਤੀ ਜਾ ਸਕਦੀ ਹੋਵੇ। ਸ਼੍ਰੀ ਅਕਾਲ ਤਖਤ ਸਾਹਿਬ ਤੋਂ ਹੁਕਮਨਾਮਾ ਜਾਰੀ ਕੀਤਾ ਗਿਆ ਹੈ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਲੜ• ਰਹੇ ਸਾਰੇ ਉਮੀਦਵਾਰ ਪਰਵਾਰਾਂ ਸਮੇਤ ਅੰਮ੍ਰਿਤਧਾਰੀ ਹੋ ਜਾਣ। ਹੁਣ ਵੀ ਸਿਰਫ਼ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਲੜਨ ਅਤੇ ਜਿੱਤ ਕੇ ਗੁਰੂਘਰਾਂ 'ਤੇ ਕਬਜ਼ਾ ਕਰਨ ਦੀ ਮਨਸ਼ਾ ਲੈ ਕੇ ਮੈਦਾਨ 'ਚ ਉਤਰੇ ਉਮੀਦਵਾਰ ਵੀ ਚੋਣਾਂ ਲੜਨ ਦੀ ਇੱਛਾ ਨਾਲ ਹੀ ਅੰਮ੍ਰਿਤਧਾਰੀ ਹੋਣਗੇ ਅਤੇ ਸ਼੍ਰੀ ਅਕਾਲ ਤਖਤ ਸਾਹਿਬ ਦੇ ਹੁਕਮਨਾਮੇ ਨੂੰ ਆਪਣੀ ਇੱਛਾ ਪੂਰਤੀ ਲਈ ਹੀ ਮੰਨਣਗੇ। ਇਸੇ ਹੁਕਮਨਾਮੇ ਦੇ ਮੱਦੇਨਜਰ ਸ਼੍ਰੋਮਣੀ ਕਮੇਟੀ ਦੇ ਸਿਟਿੰਗ ਮੈਂਬਰ ਅਤੇ ਕੈਬਨਿਟ ਮੰਤਰੀ ਸੁੱਚਾ ਸਿੰਘ ਲੰਗਾਹ ਵੱਲੋਂ ਆਪਣੀ ਧਰਮਪਤਨੀ ਨੂੰ ਤਖਤ ਸ਼ੀ ਕੇਸ਼ਗੜ• ਸਾਹਿਬ ਵਿਖੇ ਲਿਜਾ ਕੇ ਅੰਮ੍ਰਿਤਪਾਨ ਕਰਵਾਇਆ ਗਿਆ ਹੈ। ਹੁਣ ਇਥੇ ਇਹ ਵਰਨਣਯੋਗ ਹੈ ਕਿ ਪਿਛਲੀ ਸ਼੍ਰੋਮਣੀ ਕਮੇਟੀ 'ਚ ਮੈਂਬਰ ਰਹਿਣ ਸਮੇਂ ਜੋ ਲੰਗਾਹ ਸਾਬ• ਆਪਣੀ ਧਰਮ ਪਤਨੀ ਨੂੰ ਵੀ ਪ੍ਰੇਰਕੇ ਅੰਮ੍ਰਿਤਧਾਰੀ ਨਹੀਂ ਕਰ ਸਕੇ, ਉਹਨਾਂ ਨੇ ਸਿੱਖੀ ਦੇ ਪਸਾਰ ਪ੍ਰਚਾਰ ਲਈ ਕਿਹੋ ਜਿਹਾ ਯੋਗਦਾਨ ਪਾਇਆ ਹੋਵੇਗਾ, ਇਹ ਸਮਝਣਾ ਕਿਸੇ ਲਈ ਵੀ ਬਹੁਤਾ ਔਖਾ ਨਹੀਂ ਹੈ। ਹੁਣ ਇਹੋ ਜਿਹੇ ਉਮੀਦਵਾਰ ਜਿੱਤਣ ਲਈ ਪਤਿੱਤ ਸਿੱਖਾਂ ਦੀਆਂ ਵੋਟਾਂ ਲੈਣ ਲਈ ਤਾਂ ਤਰਲੋਮੱਛੀ ਹੋਣਗੇ ਹੀ, ਸਗੋਂ ਉਪਰ ਦਿੱਤੇ ਵਾਂਗ ਇੱਛਾਧਾਰੀ ਸਿੱਖ ਵੀ ਪੈਦਾ ਕਰਨ 'ਚ ਢਿੱਲ ਨਹੀਂ ਕਰਨਗੇ। ਇਸ ਵਰਤਾਰੇ ਨਾਲ ਜਿਥੇ ਇਹ ਗੱਲ ਸਾਬਤ ਹੁੰਦੀ ਹੈ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਉਪਰ ਕਾਬਜ਼ ਹੋਣ ਲਈ ਪਤਿੱਤ ਤਾਂ ਕੀ ਹਰ ਕਿਸਮ ਦੇ ਲੋਕਾਂ ਦੀਆਂ ਵੋਟਾਂ ਲੈਣ ਲਈ ਰਾਜਨੀਤਕ ਲੋਕ ਹਰ ਤਰ•ਾਂ ਦੇ ਹਥਕੰਡੇ ਵਰਤਣ ਤੋਂ ਗੁਰੇਜ ਨਹੀਂ ਕਰਨਗੇ, ਉਥੇ ਇਹ ਗੱਲ ਵੀ ਸਾਫ਼ ਹੋ ਰਹੀ ਹੈ ਕਿ ਵੋਟਾਂ ਸਮੇਂ ਅਜਿਹੇ ਇੱਛਾਧਾਰੀ ਵੋਟਰਾਂ ਲਈ ਨਸ਼ਿਆਂ ਦਾ ਦੌਰ ਵੀ ਚਲਾਉਣਾ ਚੋਣਾਂ ਲੜਨ ਵਾਲਿਆਂ ਦੀ ਹਰ ਹਾਲਤ ਵਿੱਚ ਮਜ਼ਬੂਰੀ ਬਣੇਗਾ। ਸਿੱਖ ਕੌਮ ਵਿਚ ਵੱਖ-ਵੱਖ ਮਰਿਯਾਦਾ ਵਾਲੀਆਂ ਪਹਿਲਾਂ ਹੀ ਅਨੇਕਾਂ ਸੰਪਰਦਾਵਾਂ ਬਣੀਆਂ ਹੋਈਆਂ ਹਨ, ਹੁਣ ਸਿੱਖ ਕੌਮ ਨੂੰ ਆਪਣੇ ਗੁਰੂਘਰਾਂ ਦੇ ਪ੍ਰਬੰਧਾਂ ਅਤੇ ਸਿੱਖੀ ਦੇ ਪ੍ਰਚਾਰ ਦੀ ਜਿੰਮੇਵਾਰੀ ਨਿਭਾਉਣ ਲਈ ਠੰਡੇ ਮਨ ਨਾਲ ਅਤੇ ਗੁਰੂ ਤੋਂ ਸੇਧ ਲੈ ਕੇ ਸੋਚਣ ਦੀ ਲੋੜ ਹੈ। ਵੱਧ ਰਹੇ ਪਤਿੱਤਪੁਣੇ ਨੂੰ ਰੋਕਣ ਅਤੇ ਨਵੀਂ ਪੀੜੀ ਨੂੰ ਗੁਰੂ ਨਾਲ ਜੋੜਨ ਲਈ ਇਹ ਸੋਚਣਾ ਅਤਿ ਜਰੂਰੀ ਹੋ ਗਿਆ ਹੈ ਕਿ ਗੁਰੂਘਰਾਂ ਦਾ ਪ੍ਰਬੰਧ ਸੌਂਪਣ ਵੇਲੇ ਸਾਰੀ ਕੌਮ ਨਿੱਕੀ ਮੋਟੀ ਧੜੇਬੰਦੀ ਅਤੇ ਘਟੀਆ ਰਾਜਨੀਤੀ ਤੋਂ ਉਪਰ ਉਠ ਕੇ 18 ਸਤੰਬਰ ਨੂੰ ਹੋ ਰਹੀਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਆਮ ਚੋਣਾਂ ਵਿੱਚ ਪੂਰੀ ਤਰ• ਸੁਚੇਤ ਹੋ ਕੇ ਪਹਿਰਾ ਦੇਵੇ ਅਤੇ ਇੱਛਾਧਾਰੀ ਵੋਟਰਾਂ ਨੂੰ ਹਰ ਹਾਲਤ ਵਿੱਚ ਪੋਲਿੰਗ ਸਟੇਸ਼ਨਾਂ ਤੋਂ ਦੂਰ ਰੱਖੇ ਤਾਂ ਕਿ ਸਹੀ ਪੰਥਕ ਨੁਮਾਇੰਦਿਆਂ ਦੇ ਹੱਥਾਂ ਵਿੱਚ ਗੁਰੂਘਰਾਂ ਦਾ ਪ੍ਰਬੰਧ ਸਂਪਿਆ ਜਾ ਸਕੇ, ਨਹੀਂ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਇਸ ਢਿੱਲ ਦਾ ਫਾਇਦਾ ਉਠਾ ਕੇ ਚਿਰਾਂ ਤੋਂ ਸਿੱਖੀ ਦੀਆਂ ਜੜ ਕੁਤਰਨ ਵਾਲੇ ਬਿਪਰਵਾਦੀ ਤਬਕੇ ਦਾ ਸਾਡੇ ਗੁਰੂਘਰਾਂ 'ਤੇ ਵੀ ਮੁਕੰਮਲ ਕਬਜ਼ਾ ਹੋ ਜਾਵੇਗਾ ਅਤੇ ਸਿੱਖੀ ਨੂੰ ਸਿੱਖੀ ਦੇ ਕਾਤਲਾਂ ਹਵਾਲੇ ਕਰਨ ਵਿੱਚ ਸਿੱਖਾਂ ਦਾ ਆਪਣਾ ਹੀ ਵੱਡਾ ਰੋਲ ਹੋਵੇਗਾ ਅਤੇ ਕੌਮ ਆਪਣੇ ਗੁਰੂਘਰ ਇਹਨਾਂ ਇੱਛਾਧਾਰੀ ਸਿੱਖਾਂ ਦੇ ਹਵਾਲੇ ਕਰ ਬੈਠੇਗੀ।
